Synneva Noel er ein visekunstnar frå Voss no busett i Bergen. Ho debuterte i 2013 med plata «Say». Dette er den andre album-utgjevinga hennar. Ho har skrive åtte låtar til «Moontraveller» som ofte er naive poetiske augneblikksbilete med naturmotiv og flittig bruk av besjeling. Uttrykket har mognast og blitt meir raffinert på dei åtte åra, men Noel er i høgste grad attkjenneleg.
Musikken er melodisk, mollstemt og oftast fylt med eit vemod og ein melankoli. Det er for det meste ein fin samanheng mellom tekst og musikalsk uttrykk. Høgdepunktet er den poetiske perla «Father And The Bird».
Stemma til Noel slett ikkje spesielt kraftig, men det sarte uttrykket høver som hand i hanske til tekst og musikk. Det sårbare kjem ekstra godt fram på avslutningssporet «Little Star».
Plata hadde stått seg på å vore meir gjennomarbeidd både med omsyn til produksjon og arrangement. Låtane «Man Walking» og «Pretty Boy» skil seg ut både arrangements- og uttrykksmessig. Her burde musikarane ha jobba seg fram til eit meir einskapleg ensembleuttrykk, men Stein Urheims gitarspel på sistnemnde låt er eit sterkt forsonande trekk.
Hovudinntrykket er likevel at Synneva Noel har laga ei andreplate som er eit stort steg framover. Vonleg vil ho i nær framtid få høve til å ta med seg musikk og band ut på konsert- og festivalscenar rundt om.
Lars Mossefinn
Synneva Noel (g, v), Aleksander Grieg (b, p, v), Jonas Raabe (p), Ivar Thormodsæter (dr), Jørund Gundersen (perc), Thomas Nøkling (s, bcl), Stein Urheim (g), Audun Waage (tp)
